Skënderbeu po vuan shumë për rezultate javët e fundit, e madje gaboi edhe në shtëpi me një kundërshtar modest si Luftëtari i Gjirokastrës. Korçarët e nisën garën me pretendime, por me rezultatet e javëve të fundit po rrezikojnë edhe një vend në Kupat e Evropës. Ndeshja me Luftëtarin duket se i kushtoi shumë Dejvi Bregut që shënoi një gol mjaft të bukur, por u ndëshkua me kartonin e katërt të verdhë.
Bregu nuk do të jetë në Kamzë, ndërsa skuadra korçar me shumë gjasa s’do të ketë shërbimet e sulmuesit Krasniqi që muajin e fundit ka pasur vazhdimisht oshilacione. Po ashtu edhe Ardit Hoxhaj, që edhe pse është bashkuar dje me grupin nuk do të luajë në kryeqytet. Shqetësuese paraqitet gjendja edhe për mesfushorin Demte, megjithatë, trajneri i bardhekuqve shpreson që ta ketë mesfushorin nga Etiopia në fundjavë.
